ANDAM na ang Roads and Traffic Administration (RTA) sa ilang traffic scheme alang sa Semana Santa diin gilauman ang pagdagsa sa katawhan sa mga dapit nga sagad bisitahon sa maong higayon.

Anaa na sa 95 porsyento nga andam ang RTA ilabi na sa pagpakatag sa mga traffic enforcer ug sa ilang traffic scheme.

Sa pakighinabi kang Engr. Nonito Oclarit, Assistant Department head sa RTA, gibutyag niini nga gihulatan na lang nila ang mando gikan kang Mayor Oscar Moreno.

“Gahulatan nalang namo ang executive order nga mogawas gikan kang mayor pero nag submit na mi sa traffic scheme more or less pare-pareho ra sa last year gihapon, kinatibok-an naa na ta sa 95 porsyento nga andam na ta,” matud ni Oclarit.

Gidugang pa niini nga pag-abot sa Huwebes Santo, did-an sa pagsulod ang mga sakyanan paingon sa Malasag ug duna na usab silay mga gidestino nga mga lugar kung asa pwedi nga makahunong ang mga sakyanan.

Duna na usab silay mga gipahigayong inisyal nga mga pagsusi sa mga kadalanan kung dunay mga proyekto nga maapektohan sa ilang traffic scheme atol sa pagbalaan sa semana santa.