MIDOBLE ang ihap sa mga turista sa Misamis Oriental human naila na og maayo ang lalawigan, kini ang gipahibalo ni Provincial Tourism Department head Atty. Jeffrey Saclot.

Sa unang quarter ning tuig, moabot ngadto sa 1,30,543 ka mga turista nga local ug foreign nationals ang mibisita sa lalawigan kon asa doble ang pagsaka niini ngadt sa 1,331,340 ka turista.

Samtang sa second quarter mas midaghan nga adunay natala nga 2,197,580 ka mga bisita ang nakasuroy sa nagkadaiyang tourist spots ug pilgrimage site sa lalawigan.

"The tourism activity in Misamis Oriental are getting livelier and lovelier," matud ni Saclot, kinsa miingon nga naila pag-ayo ang lalawigan sa mga pilgrimage site, hinungdan nga ang Divine Mercy Shrine sa siyudad sa El Salvador, Misamis Oriental maoy usa sa gidagsa sa mga turista.

Matud ni Saclot nga mas mosaka pa ang ihap niini kung matapos ang healing pool ug Lourdes Shrine sa Binuangan ug Christ The King sa Gingoog City.

Gibutyag sab ni Saclot nga daghan mga bag-ong nadevelop nga mga tourist spot sa lalawigan apan dunay pipila gipanag-iyahan sa pribado.

Ning tuig, nagproposed kini og budget nga P100 milyones aron pagpagwapo sa uban pa nga mga tourist spot alang sa sunod tuig.

Prayoridad nga proyekto ning tuig mao ang pagpagwapo sa Flight 387 Shrine sa lungsod sa Claveria kon asa mamahimo kining agricultural tourism site.

Sa pagsugod sa Tourism Week ning semanaha, kini nga mga kalihokan ang angayan nga hulatan sa katawhan nga ipahigayon sa Centrio Mall ning siyudad.

Tourism Week

Unang adlaw: Opening Program ug Tourism Office Inauguration and Blessings.

Ikaduhang adlaw: "Tienda sa MisOr": A MisOr Food Exhibit sa alas 2:00 sa hapon.

Ikatulong adlaw: SikaTurismo Presentation (First district), 4 p.m., Activity Center, Ayala Centrio Mall

Ikaupat nga adlaw: SikaTurismo Presentation (Second district), 4 p.m., Activity Center, Ayala Centrio Mall

Ikalimang adlaw: Food Product Presentation Contest, 4 p.m., Activity Center, Ayala Centrio Mall

Ikaunom nga adlaw: Culmination Activity; Search for the Misamis Oriental Singing Ambassador, 2 p.m., Activity Center, Ayala Centrio Mall