WALO ka samad dinunggaban ang naangkon sa 35 anyos nga lalaki human giayo og luba sa silingan niadtong niaging adlaw sa Purok-5, Gutapol, Kibawe, Bukidnon.

Giila ang biktima nga mao si Roel P. Cantos, 35, ulitawo, usa ka mag-uuma sa dapit.

Ang suspek gitumbok nga mao si Victor B. Barinque, 40, minyo, usa driver ug residente sa dapit.

Sa inisyal nga imbestigasyon sa Kibawe Police Station, basi sa pahayag ni Prociso Barinque, silingan sa biktima, nga niabot kini si Cantos sa ilang puloy-anan, nagdagan-dagan nanuktok ug nangayo sa pakitabang.

Dihang iya na unta kining abrihan, kalit miabot si Victor nga sakay og motorsiklo.

Gidoulan niini si Cantos dungan sa pagkuha niini og sundang dayon giluba makapila ka higayon.

Gani nisuway pa og sukol ang biktima apan wala na kini makasagang pa sa sunod-sunod nga pagpangluba sa suspek.

Walo ka samad dinunggaban ang naangkon niini nga maoy hinungdan sa iyang hinanaling kamatayon.

Human sa insidente, daling misibat ang suspetsado nga hangtod karon panahon padayon pa nga gipangita sa kapolisan.

Giingong daan na nga adunay bangi ang duha niagi pang bulan nga gitouhang gidumtan sa suspek.