WALA nabalaka ug nahadlok si Vice Mayor Rainier Joaquin "Kikang" Uy human gikompirma sa partido Padayon Pilipino ang mohulip sa posisyon sa pagka-bise mayor niadtong Mayo 9 human mipanaw ang iyang kaatbang nga si kanhi mayor Vicente Emano upat ka adlaw sa dili pa ang eleksyon.

Si Emano gihulipan sa iyang anak nga si Konsehal Nadya Elipe-Emano.

Sa pakighinabi kang Uy iyang gibutyag nga katungod sa kaatbang ang paghulip apan sa katapusan ang hukom gihapon sa katawhan ang mopatigbabaw.

"Ilaha man ng katungod tanan, well kandidato man gihapon ko, kandidato siya, wish her luck lang gihapon, ato lang dawaton total sa katapusan ang hukom man sa katawhan,” matud ni Uy.

Gidugang pa niini nga wala kini nabalaka ug nahadlok ilabi na kung ang basehan mao ang mga pagpanarbaho ug pagpanerbisyo diha sa katawhan.

"When it comes to performance wala ko ma-threaten ug wala sad ko nahadlok sa bisan kinsa kung trabaho ang ato gipangita ug basehan kay nakahibalo ko nga kada adlaw ako gatrabaho, we will fight until the end," dugang niini.

Gidugang usab niini nga mas maayo nga dunay simpatiya kun unta maayo usab ang gihimo ug serbisyo diha sa konseho apan nibutyag nga gani diha sa ilang mga rekord si Nadya ang dunay pinakadaghan nga absences tali sa tanang mga regular nga membro sa konseho ug giingong wala kini naglihok diha sa iyang komitiba.