GIKLARO karon sa 4th Infantry Division-Philippine Army (41D-PA) nga magpadayon ang kasundalohan sa mga operasyon.

Si First Lt. Tere Ingente kinsa tigpamaba sa 4ID nibutyag sa SunStar SuperBalita nga karon nga ubay-ubay sa mga sakop sa New People’s Army (NPA) ang nasikop lakip na ang pagkasikop ni Myles Albasin nga giingong lider sa Anakbayan sa Cebu ug graduate sa University of the Philippines-Cebu ug lumad nga taga Bukidnon.

"Sa pagkakaron, padayon gayud atong operasyon ug hangtod walay kamandoan si Presidente Duterte nga ipadayon ang peace talks kami sa mga sundalo andam kanunay sa pakigbatok sa walhong grupo," kini ang pahayag ni Ingente.

Migawas ang daghang apela karon sa social media nga ipadayon ang hisgotanan pangkalinaw ug ipaubos sa amnestiya ang mga nadakpan nga mga NPA ug ipadayon ang saad ni Presidente Rodrigo Duterte nga buhian ang mga rebeldeng nangadakpan.

Dugang ni Ingente nga dili tungod kay adunay nadakpan nga mga adunay dagkong posisyon sa grupo sa NPA susama sab sa nadakpan didto sa Agusan del Norte nga mga recruiter ug tigpamaba sa walhong grupo sa dapit singgit na dayon karon ang peace talks.

"Karon na sila manawagan og peace talks nga daghan na ang nadakpan sa ilang grupo nga dagko og mga posisyon. Kung magpadayon ang peace talks, mapaniguro ba nila sa ilang mga kagrupo nga hunongon ang opensiba?" Matud ni Ingente.

Matud niini nga kaniadto pa bisan og kamulo ang pagpahigayon sa hisgotanang pangkalinaw nagpadayon ang opensiba sa walhong grupo ug daghan gihapon sa engkwentro ang gakatigayon.

Hinoun ang 4ID bukas kanunay sa hisgotanan pangkalinaw ug gani padayon sila sa pag aghat sa walhong grupo nga mosurender na tungod kay daghan tanyag karon ang gobyerno niadtong NPA nga mobalik sa sabakan sa gobyerno.

Apan subling gipasabot niini nga moagad lamang sila karon sa mando ni Presidente Rodrigo Duterte kon mahibalik ba ang hisgotanang pangkalinaw.