ADLAW’NG Huwebes, Marso 21, usa ka day-off alang sa tanan nga mga kababayen-an nga mga empleyado sa Kapitolyo Probinsyal aron saulogon ang Women’s Month celebration.

Kini nga adlaw gihatag ni Misamis Oriental Governor Bambi Emano aron nga makalakaw ug makalingaw-lingaw ang iyang mga trabahante pinaagi sa pagpangaligo og dagat ug mag enjoy nga daw dili maghuna-huna sa daghang trabahoun sulod sa Kapitolyo.

Niaging tuig, gi-treat ang tanan kababayen-an sa Seaven Seas Waterpark, samtang karon nagkatapok sila sa usa ka beach sa Initao, Misamis Oriental.

Matud ni Emano nga isip siya miyembro sa ug sakop sa International Order of Demolay, usa sa maayung pagtulon-an nga iyang nakuha sa Demolay kining pagrespeto sa mga kababayen-an hinungdan nga bililhon alang kaniya ang ilang panahon.

“Usa sa pagtulun-an nga gitudlo kanamo sa Demolay is always to honor womanhood mao gyud na ang usa nga gitatak sa among utok, kasing-kasing alimpatakan to honor womanhood. Kon tagaan sa higayon ang mga kababayen nga molakaw ug mobiyahe ikalipay gyud kana sa akong mama nga nagsabak sa ako sulod sa siyam ka tuig ug sa akong igsuon nga mga babae, I had always been and honored womanhood,” mensahe niini.

Samtang wala ang kababayen-an sa Kapitolyo ang mga lalaki nga empleyado ang nagkatigom sab alang sa “We Men” kon diin usa ka parlor games ang gipahigayon, adunay search for Miss Gay ug ubang kalihokan.

Sa pagpaniudto, usa ka boodle fight nga gisalohan sa tanan empleyado sa kauban mismo si Emano kon diin nihatag sab kini og mensahe ngadto sa iyang mga empleyado pagpahimangno unsa ka bililhon ang kababayen-an.