DAGHAN ang naka-“wow” sa nakitang mga whale sharks sa lungsod sa Salay, Misamis Oriental.

Sa post ni Oscar Salcedo, kanhi Land Transportation Office (LTO)-Northern Mindanao director, iyang nakuhaan og video ang mokabat unom ka mga whale shark sa dagat sa maong lungsod.

Kung basihan ang video, madungog ang tingog niini nga sige og sampit nga “Oh My!” “Wow diin labihan ang pagdayeg ni Salcedo sa mga naglukso-lukso nga mga whale shark.

Ang mga whale shark susama kini nga makita sa lungsod sa Oslob, lalawigan sa Sugbo, nga gidagsa og mga turista lokal man o internasyunal diin mokita kini og milyon matag adlaw.

Kung mahitabo nga dili kini pasipad-an ug bahugan, posibleng masusama ang lungsod sa Salay sa Oslob nga nakahatag og dakong tabang sa ilang turismo.

Ang views sa video nga wala pa miabot sa 24 oras gikan sa post niini moabot na og dul-an sa 118,000 views ug liboan ka mga shares.

Dili lamang kini ang unang higayon nga nakita kini sa probinsya apan matugaw tungod kay sila pasakitan.