WALA nay natalang kaso sa tipdas sa dakbayan sa Cagayan de Oro human sa hugot nga kampanya pag-aghat sa mga ginikanan nga magpabakuna sa ilang mga masuso tungod usab sa nahitabong outbreak.

Matud ni Doktora Fe Bongcas, officer sa City Health Office (CHO), nga dul-an 100 porsinto na ang mga napabakunahan gani gihunong na ang ilang gihimo nga house to house nga pagpamakuna.

Nanghinaut ang CHO nga wala nay mahitabong outbreak sa tipdas.

Nag-aghat usab kini sa mga wala pa nakapabakuna nga mobisita lamang sa labing duol nga health center tungod kay padayon pa usab ang ilang paghatag sa maong serbisyo.

Kahinumduman nga dunay lima ka mga namatay nga bata sa natalang kaso sa tipdas niadtong bulan sa Pebrero ug Marso ilabi na sa Barangay sa Dansolihon, Mambuaya ug Barangay Lapasan.