NATAGAKAN og duha ka boxers ang Cagayan de Oro City delegation atol sa ika-duhang gabie sa 2018 Philippine National Games boxing event niadtong Martes sa New Cebu Coliseum.

Maayo ang pagsugod sa Team CdeO boxing team atol sa unang gabie diin nangdaug ang tulo ka boxers ug walay naparot.

Apan sa sunod gabie, natagak sila Wesley Caga ug Martin Pule Caspe human gipangparot sa ilang kadaiyang kaatbang.

Napilde si Caga kang RP boxing team member Junmilardo Ogayre sa Davao agi sa split decision sa ilang youth men bantamweight nga panagsangka.

Sa susamang desisyon, napukan si Caspe kang kang Daryl Canedo sa ilang youth men welterweight fight.

Si Mark Lester Durens lang ang nidaug kontra pa gyud sa iyang kababayan ug teammate nga si James Ian Solis Pangga sa youth men light flyweight.

Mao ni ang iyang ikaduhang sunod-sunod nga kadaogan alang kang Durens ug niabante na siya sa quarterfinal.

Sa pikas bahin, unom pa ka boxers ang niaway kagahapon sa ning pagsulat.

Tulo kanila mga miyembro sa RP Boxing Team nga sila Mark Lumbab, Jorge Nues ug Jena Baja.

Niaway sab si John Ignatius Macas sa iyang ikaduhang away, samtang mosangka sila John Paul Panuayan ug Elay Pamisa sa ilang unang fight kagahapon.