PABILING walay tatsa ang Cagayan de Oro National High School o City High Tigress sa nagpadayon nga aksyon sa 2018 Rebisco Volleyball League 18-under girls Northern Mindanao leg.

Kini, human mainat sa City High ang ikatulong sunodsunod nga kadaogan sa bracket B agi sa 25-17, 20-25 ug 25-19 nga desisyon kontra sa St. Michael’s College of Cagara niadtong Sabado sa Nazareth Gym.

Sa maong stado, sulod na ang Tigress sa crossover round bisan pa man mapilde sila sa ilang kataposang dula sa bracket B.

Sa pikas bahin, nangulo karon ang Corpus Christi School lady Knights sa bracket A nga adunay 2-1 win-loss record.

Gipilde sa lady Knights ang Punta Flecha sa Zambonga del Sur sulod sa duha ka sunodsunod ka sets, 25-15 ug 25-9.

Apan, naangkon nila ang unang kapildehan kontra sa Merry Child School, 12-15, 25-16 ug 18-25.

Ang Merry Child adunay usa ka daug ug usa ka pilde agi sa forfeit sa unang adlaw.

Pahumanay tanan mga elimination games sa matag bracket kagahapon ug diha mabal-an kinsa mag-agbat sa semifinals karon.