Naapsan sa Cagayan de Oro City (CdeO) ang Iligan City sa gipagawas nga final ug official results sa 2018 Philippine National Games (PNG), diin nahuman niadtong Mayo 25 sa Cebu City.

Kini, naangkon sa Team CdeO ang pagpangulo sa Northern Mindanao agi sa usa ka gold nga deperensya sa gipagawas nga final result niadtong Lunes, Hunyo 4.

Nilanding ang Team CdeO sa ika-18 nga dapit nga adunay 10 gold medals, four silvers ug 11 bronzes, samtang hingpit nagsunod ang Iligan sa ika-19 nga adunay nine golds, 11 silvers ug 28 bronzes.

Sa wala pa ang final result, naa ang Iligan sa ika-14 nga dapit nga anaay 9-10-27 (gold/silver/bronze) sa partial and final results sa alas-sais sa gabie niadtong Mayo 25.

Ang Team CdeO naa sa ika-32 nga dapit nga anaay 4-4-10 nianang tungora.

Apan, nibida ang Team CdeO boxers sa kataposang adlaw sa PNG human giharus nila tanan nila finals.

Nihatag ang Oro boxers og unom ka gold ug usa ka bronze aron maapsan ang Iligan.

Butyag ni city sports overseer Rocky Calingin nga mas molambo pa ang pwesto sa Team CdeO sa sunod labina maapil na ang arnis ug taekwondo kay mao ni ang duhaka sports gadala og dungog sa dakbayan.

“We will improve next year especially of the inclusion og arnis and taekwondo,” ingon ni Calingin.

Ang Davao City maoy naghari sa tibook pulo sa Mindanao nga nihuman sa ika-upat nga pwesto sa over-all final result nga adunay 19-31-44.

Nagsunod ang General Santos nga naa sa ika-unom nga anaay 17-24-34, samtang ang Zamboanga naa sa ika-siyam nga nilangkat og 14-7-19.

Ang host Cebu City ang naghawod sa tanan sa ning edisyon nga PNG nga nitala og 48-69-79, samtang naa sa ikaduha nga pwesto ang Baguio City nga nibitbit og 38-37-59.

Ikatulo sa over-all ang Mandaluyong City nga nikolekta og 27-18-30.