DEAR Tita Heart,

Maayong adlaw kanimo tita ug sa tanan suki sa SunStar SuperBalita, magpatambag unta ko nimo tita kay namroblema ko pag-ayo sa akong uyab nga dili na nako makontak sukad miuli siya sa ilaha sa Davao. Gi-block nako niya sa social media ug dili nasad nako makontak iyang cellphone number. Unsa akong buhaton tita nga maayo man iyang pagbiya gihatod pa nako siya sa terminal. Unsay akong buhaton tita kay dili ko mahimutang.

James

Hello James,

Maayong adlaw kanimo ug salamat sa pagsulat ngari kanako. Imo na ba gipang-message ang iyang mga kaparyentihan nga friend nimo sa Facebook? Pagpamalihog kanila. Apan kon dili gyud ug walay reply gikan kanila kon willing ka moapas aron lang gyod mahatagan katin-awan ang tanan nga naa sa imong huna huna. Mas maayo man gyod untang magkaestorya mo ug mapasabot ka niya sa iyang mga problema aron pud dili ka maglibog ug di mahimutang, basin man gud naa siya problema nga dili lang niya masulti sa imoha. Kung pasabot ana dili na siya gusto makig communicate nimo hinay-hinaya og dawat ug paglingaw lingaw sa imong kaugalingon kay lisud pud mamugos ka nga siya man nagpalayo.

Tita Heart