HUMAN ang kampo ug kaalyado ni Cagayan de Oro Mayor Oscar Moreno nga mibalhin og partido gikan Liberal Party ngadto sa Partido Demokratiko Pilipino–Lakas ng Bayan (PDP-Laban), misunod usab si Misamis Oriental Governor Yevgeny “Bambi” Emano nga ihan-ay ang iyang lokal nga partido nga Padayon Pilipino ngadto sa Hugpong ng Pagbabago.

Sa kasamtangan, ang PDP-Laban giulohan ni Presidente Rodrigo Duterte isip chairman, ug ang Hugpong usa ka rehiyonal nga partido nga gipangulohan ni Davao City Mayor Sara Duterte, anak sa presidente sa

nasud.

Una nang gisaysay ni Mayor Sara nga ang Hugpong gihimo isip usa ka lokal nga partido nga buot mo tutok sa Davao Region, ug wala kini’y plano makig kompetinsya sa nasyunal nga kalihukan.

Nakahimuot aning tanan, bisan pa nga tumong sa kampo nila Emano ug Moreno nga makig-alyansa sa kasamtangang administrasyon, apan dayag gihapon ang dili nila pagka-uyon sa matag-usa pinaagi sa pagpili og partido nga ilang talian og alyansa.

Sa umaabot nga eleksyon, ang kampo ni Emano ug Moreno duna ma’y suportahan nga mga kandidato sa nasyunal nga magkaparehas, apan pag-abot sa lokal nga bahin magpabilin pa tingali ang ilang mga isyu

nga ga-ipang wadwad ngadto sa katawhan.

Duna pa kaha’y higayon nga moabot ang panahon nga sa lokal nga politika, magkahiusa na ang nagbanging mga partido tali nila Moreno ug Emano?

(nefluczon@gmail.com)