UBAY-UBAY ka mga tinun-an ug atleta ang mitagbo sa patayng lawas ni Olympian table tennis player Ian Lariba niadtong gabii sa Biyernes, Septiyembre 7, 2018, dihang gihapit kini sa Misamis Oriental Integrated Sports Center (Moisc).

Si Nicole Managbanag, ang provincial information officer sa Misamis Oriental, niingon nga paagi kini ni Governor Yevgeny Vincente Emano nga mahatagan og pasidungog si Lariba diin iyang malantaw balik sa pamilya ang lugar kon diin kanunay nagpraktis si Lariba.

Dugang niini nga ang sports center nahimo na nga ikaduhang puloy-anan ni Lariba samtang nag-edad pa kini og 10 anyos.

Dakong garbo ang hatod niin sa siyudad sa Cagayan de Oro ug probinsya sa Misamis Oriental ug dakong kawad-on sab ang pagkawala niini.

Usa ka silent prayer ang gihatag sa mga tinun-an ug mga higala niini gikan sa Corpus Christy School ug mga higalang atleta diin ang lungon niini giitsahan og rosas.

Sa pag-agi usab niini sulod sa oval sa MOISC ang mga tinun-an pulos nagdala og kandila.

Gihulagway ni Managbanag nga usa ka solemn nga kalihokan nga gikalipay sab sa pamilya ni Lariba.

Gikan pa sa kaulohan ang patayng lawas ni Lariba nga nahidangat niadtong Biyernes mga alas 6:30 sa gabii sa Laguindingan Airport ug pagdangat ning siyudad gihapit sa MOISC usa dayon dalahon sa St. Peter sa Lumbia ning siyudad.

Karong adlawng Lunes, Septiyembre 10, 2018, gitakdang ihatod sa iyang katapusang kapahulayan si Lariba sa Oro Garden.