ANG ulahing batikos ni Presidenti Duterte ngadto sa kadagkuan sa Simbahang Katoliko, labi na sa mga obispo ug kaparian, nimugna og daghang panghunahuna, gawas ug sud sa simbahan.

Wa gisentro ni Duterte iyang pagsaway sa doktrina sa simbahan apan ngadto mismo sa nagdumala niini. Pero kon imong sabton, tataw nga gikwesiyon sab niya ang “pagtuo” sa simbahan.

Sa iyang pagluwat nga “estupido” kining ginoo sa mga pari, daghang mga Katoliko ang wa mahimuot, daghan sab ang miuyon.

Kon atong husayon ang ulahing mga pagsaway ni Duterte ngadto sa kaparian, masabot nato nga duna siyay igong kasayuran sa mga “binuang” sud sa simbahan.

Ug labaw sa tanan, tataw nga nagbasa og Bibliya si Duterte kay nasayod siya sa mga hiwi nga doktrina nga wala masubay sa kabubut-on sa Dios nga gipatin-aw diha sa Kasulatan.

Kining pagpunay og bulgar ni Duterte sa baho sa simbahan nakayagyag hinuon sa tiunay nga “pagtuo” sa mga “kunohay” sunosunod ni Jesu-Kristo – Katoliko man o Protestanti.

Ngano man? Bisan kadtong mga professional – abogado, engineer, doctor o bisan sakop sa media minunot sa panghunahuna nga “dautan” kadtong pamahayag ni Duterte ug ilang gidepensahan ang ilang “pagtuo” diha sa simbahan.

Apan, samtang gidepensahan nila ilang pagtuo pakyas sab sila sa pagpatin-aw kon nasubay ba gyud sa Kasulatan ilang gisandigan nga pagtuo. Sa laktod, kon unsa may gitudlo nila sa kaparian diha ra usab taman ang ilang pagsabot.

Ambot kon makapasabot ba kining yanong parokyano kabahin sa doktrina sa purgatoryo o bisan kining kabahin sa kamatayon. Ang mga protestanti sab, ambot kon makapatin-aw ba usab sila bahin sa ilang gituohan nga “ubos na sa grasya” ug dili na tumanon ang ubang kasugoan kay naapil na sa paglansang ni Kristo sa krus. Kon dili sila maka-ekplikar niini subay sa Bibliya, nan, wa silay kalainan sa buta nga giagak og buta.

Daghan man gani ang wa gyud masayod kon unsay tiunay nga kahulogan niining paghatag nato og halad sa simbahan, kana pang laglom nga doktrina.

Tingali magpasalamat ta nga dunay Presidenti nga nag-aghat nato sa pagbuka sa atong mga mata. Busa, maisip nga hagit kining pamahayag sa presidenti aron kita mismo motuki sa kamatuoran ug dili lang magdependi unsay gipanulti sa atong lider sa simbahan.

Atong hinumdoman ang kasaysayan, liboan na ka mga tumotuo ang misimang sa maayong dalan tungod kay gipahisalaag sila mismo sa ilang pangulo sa simbahan. Duna gani, nag-mass suicide tungod sa ilang hugot nga pagtuo sa ilang lider. Resulta kana sa kakuwang og pakigdugtong personal ngadto sa Dios. Ug makab-ot lamang kining relasiyon sa atong kaugalingong pagtuon sa Iyang mga pulong.

Aron dili kataw-an ug bugalbugalan, modepensa man ta o moataki sa pamahayag ni Duterte, kinahanglan nasayod pud ta sa atong baruganan kay ang presidenti sa iyang bahin, duna siyay gibasihan sa iyang pagsaway sa hiwi ug salawayon nga kalihukan sa kaparian. Ikaw nasayod ka o nagpabuta-bungol lang?