GIANGKON ni Presidenti Rodrigo Duterte nga “usahay” maulaw siya tungod niining gihimong dynasty sa ilang pamilya pagdumala sa Davao City.

Apan, gibasol sab niya ang katawhan pagpili sa ilang pamilya nga maoy modumala sa dakbayan sulod sa taas nga panahon.

Karon, mihagit ang presidenti nga unta magmugna og polido ug solido nga pundok ang oposisiyon aron mopukan sa dynasty sa ilang pamilya.

Ang mensahi ni Duterte wala kini magtumong lamang sa Davao apan maisip kini nga tukma ug haom nga panag-ingnan sa ubang bahin sa nasod diin nagpadayon ang dynasty sa pamilya.

Dunay bentaha sa dynasty sa politika, kana, kon maayo pagkadumala sa pamilya ang usa ka local government unit. Apan, kon ang tinguha lamang sa pamilya mao ang paghupot sa katungdanan aron mapalambo ang interest sa ilang pamilya, nan, kana maoy mapait nga kamatuoran.

Sa ubang probinsiya o siyudad, dunay pamilya nga naghupot sa liderato sa gobiyerno sulod sa dugayng panahon. Kuwang og asenso ang ilang dapit, kay gipalabi sa pamilya ang paglambo sa ilang negosyo inay ang paghatod og batakang serbisyo ug pag-develop sa ilang lugar.

Sa bahin sa Davao, makita nato ug madungog nato sa mga balita kon giunsa pagpauswag sa mga Duterte ang maong dakbayan. Natagbaw ang kadaghanan, busa kanunay nilang gisuportahan ang liderato sa mga Duterte.

Apan, nganong hangtod karon nagpabilin pa gihapon kining political dynasty sa nasod. Nganong wala man gyud kini maundang tungod ba sa mga botanti?

Kon sinsero gyud atong gobiyerno -- labi na atong magbabalaod, hingpit nila ipatuman kining pagdili sa political dynasty. Unsaon man nila pagduso sa balaod nga mismo sila ang makabentaha man.

Tinuod ang pangagpas ni Duterte nga mismo ang mga botanti maoy nagdaseg niining political dynasty. Kon inutil atong gobiyerno, labi na ang atong Kongreso pagkontra sa dynasty, kita nga mga botanti mobarog unta sa atong katungod aron mapukan na kining pagdumala sa pamilya sa atong gobyerno.

Apan, lagi kon mopili ta og laing pamilya unya walay mahatag nga kaayohan, mas mopabor nalang sab ta sa pamilya nga kanunay nagdumala sa rinda sa gobiyerno apan daghan uyamot nga kaayohan natunol ngadto sa komunidad.

Busa, dunay political dynasty o wala, ang kauswagan ug paglambo sa katilingban magdependi ra gyud kana kon wala kining kahakog ug kasuwapang sa namunoan.