DUL-AN sa 50 na ka mga local government units sa Central Visayas ang napaubos na sa vulnerability and risk assessment sa Mines and Geosciences Bureau (MGB) 7.

Kini moresulta sa pag-umol na sa mga exposure maps diin ipakita niini ang porsyento sa populasyon, mga edipisyo ug mga dalan nga posibleng maapektohan kung pananglit aduna’y baha, pagdahili sa yuta ug linog.

Kini usab magamit kauban ang 1:10,000 scale nga geohazard map nga maoy basehan kung ang usa ka lugar peligro ba sa natural nga katalagman sama sa pagbaha ug pagdahili sa yuta.

Karon tuiga aduna'y unom ka munisipalidad sa lalawigan sa Sugbo ug Bohol ang napaubos sa maong assessment.

Naglakip kini sa mga lungsod sa Antequerra, Balilihan, Corella, ug Sikatuna sa Bohol ug ang mga lungsod sa Oslob ug Santander sa probinsya sa Sugbo.

Aduna pa’y lain lima ang ipaubos pa niini diin naglakip kini sa lungsod sa Alcoy ug Boljoon sa Sugbo; ug ang lungsod sa Dauin ug Sibulan sa Negros Oriental ug Siquijor.

Nagsugod ang maong assessment sa MGB 7 niadtong tuig 2015 human nila nahuman ang geohazard maps.

Giuna og paubos sa assessment ang lalawigan sa Bohol hilabi na nga grabe kining naapektohan sa kusog nga linog niadtong tuig 2013.

Si Al Emil Berador, chief geologist sa MGB 7, niingon nga mas detalyado kining exposure maps tungod kay mahibaw-an kon pila ka tawo ug estraktura ang maapektohan kon pananglitan aduna'y kalamidad susama sa linog ug baha.

Ipanghatag usab kini ngadto sa LGU o sa mga tag-barangay kon mahuman na kini. (HBL)