Usa ka lang ka buwan sukad nakagawas sa bilanggoan tungod sa kaso sa gidiling drugas, nasikop og balik atol sa buy-bust sa Brgy. Balungag, lungsod sa San Fernando, alas 11:15 sa gabii, Martes, Marso 26, 2024.

Ang nasikop mao si Alan Latoy Lapinid, 52, minyo, way trabaho, taga Brgy. Calidngan, dakbayan sa Carcar Sugbo.

Ang operasyon gilusad sa San Fernando Municipal Police Drugs Enforcement Unit Intelligence nga gipangulohan sa ilang deputy chief nga si Police Capt. Ramuel Banogon ubos sa direktiba sa ilang hepe nga si Police Maj. Anthony Villanueva.

Ang operasyon ubos sa koordinasyon sa Philippine Drug Enforcement Agency (PDEA 7).

Matod pa nga ang suspek na-validate sa mga sakop sa Intelligence Police sa San Fernando nga namaligya’g shabu sa ilang area of responsibility labina sa kabukiran mao nga gilusad ang buy-bust.

Ang undercover police nigamit og P500 nga buy-bust money aron pagpalit sa usa ka gamay nga pakite sa shabu gikan sa suspek.

Sa dihang nadakpan na, nakuhaan pa kini og walo ka putos sa shabu nga motimbang og 4.5 gramos nga may standard drug price nga P31,000. / DVG