DUHA ka gikatahapang bigtime drug dealer ug sakop sa usa drug network sa Sugbo nakuhaan og usa ka kilo sa gituohang shabu dihang nasikop sa hiniusang operasyon sa Consolacion Police Station ug Mandaue City Police Office, sa Huwebes sa alas 9:30 sa gabii, Septiyembre 10, 2020 sa usa ka condominium sa Subangdaku, Siyudad sa Mandaue.

Ang mga suspek giilang sila si Kris Yamas Orlanda, 34, taga Deca Homes Condominium, Hernan Cortes street, Kasambagan, Subangdaku ug Elsie Caranzo Danlag, alyas Cheska, 26, taga Barangay Lamac, lungsod sa Consolacion.

Apan nakaipsot ang kauban nga si Psyche Gonzales Hortelano, taga dakbayan sa Danao nga maoy target kay direkta kini nga contact sa supplier sa illegal nga drugas.

Nakuha sa kapulisan gikan sa mga suspek n ang usa ka dakong putos sa gituohang shabu nga motimbang og usa ka kilo lakip na ang usa ka putos nga adunay gibug-aton nga 5 gramos. Matod ni Police Major Vernino Noserale, hepe sa Consolacion police, nga mobalor ang tanan og P6.868,000./ AYB