Ormoc City - Tulo ka ang kompirmadong patay samtang unom ang samaran sa dihang gibanhigan sa mga gituohang sakop sa New Peoples Army (NPA) ang kasundalohan sa 52 Infantry Battalion sa Sitio Cabatas, Barangay 4, lungsod sa Lipapa, Eastern Samar, pasado alas 6:00 sa buntag, Miyerkules, Hulyo 7, 2021.

Sa paghimo ning balita, wala pay kompletong detalye ang mga awtoridad bahin sa insidente.

Apan base sa pasiunang imbestigasyon, lima ka sakop sa Philippine Army (PA) ug siyam ka sakop sa Citizen Armed Force Geographical Unit (Cafgu) ang padung unta sa ilang gipatukod nga kampo.

Mga 70 metros na lang unta sa una pa ang ilang gipatukod nga kampo, tulo ka landmines ang sunod sunod nga nibuto ug dayon gipauwanan sila og mga bala.

Gibanabana sa kasundalohan nga kapin sa 30 ka mga NPA ang nibanhig kanila.

Ang maong insidente miresulta sa pagkaangol sa unom ka Cagfu ug pagkamatay sa usa ka army ug laing duha ka Cafgu.

Ang mga naangol mao sila si Edwin C. Adamero, Civilian Active Auxliary (CAA); Francis A. Legarse, CAA; Manny D. Maestre, CAA; Ronilo P. Porton, CAA; Jeffrey R. Pajanustan, CAA ug Helbert O. Pajanustan, CAA.

Dali nga gidala sa usa ka tambalanan sa Samar ang mga samara.

Samtang ang mga nakalas mao sila si Army Technical Sergeant Junar Carpila, PA; Mark Donald Lomuntad, CAA ug Geremias Etcobañas, CAA.

Wala pa masayri kung pila ang nakalas ug naangol sa mga NPA.

Ang maong insidente nilanat og 20 minutos samtang padayon pa ang follow-up operation sa mga awtoridad. (JKDP)