Usa ang patay ug duha ang nangaangol sa sunog nga niigo sa pito ka mga tindahan sa may dan F. Llamas, Barangay Punta Princesa, Dakbayan sa Sugbo sa Biyernes sa alas 5 sa hapon, Nobiyembre 20, 2020.

Mibuto nga tangke sa liquefied petroleum gas (LPG) sulod sa usa ka tindahan sa inasal nga manok ang gitumbok sa Cebu City Fire Department nga maoy hinungdan sa sunog.

Ang namatay giila ni FO2 Emerson Arceo nga si Cesar Caranza, 70, giingong naglubog sa banig kay masakiton.

Samtang ang mga nangaangol nga naa sa tambalanan giilang sila si Gerald Chu ug Arnold Cabudsan, mga kawani sa Chooks To Go diin nagsugod ang kayo. Matod ni Arceo nga ang sunog nagsugod alas 5:10 sa hapon dihang nibuto ang LPG nga gigamit sa tindahan.

Sa pagbuto, nangalabay sila si Chu ug Cabudsan.

Ang duha daling gidala sa Vicente Sotto Memorial Medical Center (VSMMC).

Nikatap ang kayo ngadto sa laing unom ka kasikbit nga mga stall sa dapit.

Wa pa mahibaw-i sa kabomberohan, sa pagsuwat ning taho, ang hinungdan sa pagbuto sa LPG tank kay giatiman pa sa mga mananambal ang duha ka mga kawani.

Matod ni Arceo nga hingpit nilang napawong ang kayo mga alas 6:22 sa gabii. Ang sunog nibilin og P800,000 nga danyos sa mga kabtangan. / BBT