HUMAN sa Lapu-Lapu City Jail Female Dormitory niadtong Lunes Enero 27 laing mga buhatan na usab sa Lapu-Lapu City Hall ang gikatakdang butangan ug pahibawo nga “This is a Drug-Free Workplace” sa City of Lapu-Lapu Office for Substance Abused and Prevention (C-Losap).

Kini ang gipahibawo ni Garry Lao ang pangulo sa C-Losap dihang nahinabi ning mantalaan kagahapong adlawa Enero 29.

Matod ni Lao nga kining mga buhatan maoy nakita niya nga walay tiggamitan ug ilegal nga drugas human sa gipahigayon nilang mga kinalit nga drug test sukad sa miaging Hulyo sa miaging tuig.

Gawas sa pagbutang ug pahibawo sa ilang buhatan pinaagi sa tarpaulin tagaan usab sila commendation sa C-Losap sa ilang natampo nga nahimong walay tiggamitan ug drugas sa ilang buhatan.

Giklaro hinuon ni Lao nga wala usab nagpasabot nga ang mga buhatan nga adunay nag positibo sa ilang mga drug test kaniadto dili na usab nila mabutangan ug susamang pahibalo sa umaabot apan moagi pa una sila ug proseso.

Sama pananglit nga kinahanglan wala na gyuy mag positibo sa mosunod nila ngdrug test sa umaabot.

Giklaro usab ni Lao nga bisan ang mabutangan na ug pahibawo nga sila usa ka “Drug-Free workplace” mahimo usab nga bakwian niini sa higayon nga aduna usay mag positibo sa ilang padayong pagpahigayon ug kinalit nga drug test.

Kahinumdoman, ang Lapu-Lapu City Jail Female Dormitory sa Soong, Mactan maoy unang pasilidad sa dakbayan nga gibutangan ug pahibawo nga usa kini ka “Drug-Free workplace” human miagi sa kuti nga validation sa oversight committee nga gipangulohan sa Philippine Drug Enforcement Agency (PDEA) 7.

“Ang significance ani kung ang usa lugar nga drug-free siya workplace murag kana bitawng makapanghambog ta and then at the same time ang atong service nga mahatag sa katawhan ang pagsalig nila bitaw unya also it would boast the morale of the office nga we will be working hard to promote a drug-free community nga sila pud mismo motabang sad aron ang atong opisina ug katilingban malayo pud sa druga” pagpasabot ni Lao. (GCM)