ANG Cebu City Government mobutang og 10 ka dialysis machines sa duha ka mga dapit alang sa mga pasyente sa coronavirus disease (Covid-19) ug kadtong wa natakboyan nga nanginahanglan niini.

Si Mayor Edgardo Labella nagkanayon nga lima niini adto ipahimutang sa Cebu City Quarantine Center (CCQC) alang sa mga pasyenteng gi-Covid ug sa samang higayon nanginahanglan og dialysis.

Ang laing lima ipahiluna sa SM Seaside City sa South Road Properties (SRP) nga ang alang sa mga pasyenteng way Covid.

Si Hospital Administrator Yvonne Cania sa Cebu City Medical Center ( CCMC) nagkanayon nga sila maoy modala sa operasyon sa dialysis center sa CCQC, apan ang VSMMC ang modumala didto sa SM Seaside City.

Ang manager sa CCQC niingon nga aduna na silay pwesto nga butangan sa maong mga machine sa quarantine center nga haom para sa mga adunay Covid.

Si Cania nagkanayon nga posibleng magamit na ang maong mga makina karong Agusto 20, 2020.

Ang pag-abot sa mga kahimanan nahimong posible gumikan sa paningkamot sa Siyudad ubos sa buhatan ni Cania.

Si Kongresista Janet Garin maoy instrumento para mahatagan ang Dakbayan og mga ekipo gikan sa Department of Health (DOH) aron matabangan ang dialysis patient nga adunay Covid ug kadtong wa matapti sa maong saakit.

Si Cania niingon nga adunay bayad ang serbisyo, apan ilang paninguhaon nga malibre ang taga Cebu City gumikan sa programa sa Philhealth, Philippine Charity Sweepstakes Office (PCSO) ug Champ sa Cebu City Government. (PAC)