Nilapas na sa 100 ang nangamatay sa coronavirus disease 2019 (Covid-19) sa dakbayan sa Sugbo sud pa lang sa 13 ka adlaw sa Agusto.

Si Konsehal Joel Garganera, deputy chief implementer sa Emergency Operations Center (EOC), niingon nga sa Agusto 13, 2021, aduna nay 106 ka mga tawo ang nangamatay tungod sa Covid-19.

Niadtong Agusto 13, nakatala ang EOC og dugang 11 ka nangamatay tungod sa maong sakit.

Base sa datus sa EOC, sa 11 nga nangamatay niadtong Agusto 13, tulo niini anaa sa pangedarong 71 ngadto sa 80 anyos, samtang tagduha sa nangamatay sa age group nga 31-40 anyos, 41-50 anyos, 61-70 anyos, ug 81-90 anyos.

Sukad sa pag-igo sa Covid-19 sa Dakbayan sa miaging tuig, niabot og 1,072 ang gidaghanon sa nangamatay base sa EOC data.

Ang dakbayan aduna’y case fatality rate nga 3.20 percent.

Sa Hunyo, 14 ang nangamatay sa maong sakit, ug 87 niadtong Hulyo.

Ang kinatibuk-ang mga kaso sa dakbayan naabot na og 33,524 ug 28,964 ang nangaayo.

Ang dakbayan sa Sugbo aduna’y 3,488 ka aktibong kaso sa Covid-19 sa pagkakaron.

Sa kasamtangan, adunay 9.27 percent positivity rate ang dakbayan gikan sa 361,063 ka mga Covid-19 tests nga nahimo sukad naapektuhan ang dakbayan sa pandemya niadtong 2020.

Moabot na sab og 75 sa 80 ka barangay sa siyudad ang dunay aktibong mga kaso sa Covid-19, samtang lima ka barangays wa makatala og pagpanakod sa milabay nga 10 ka mga adlaw.

Sa nakalabay nga mga adlaw, gikan sa Agusto 4-13, ang Barangay Guadalupe nitala sa labing daghan diin niabot og 194 ang kinatibuk-an.

Ang Guadalupe mao usab ang labing dakog populasyon sa Dakbayan sa Sugbo.

Laing mga barangay nga nitala sa labing daghan og mga kaso sa nakalabay nga 10 ka mga adlaw naglakip sa Talamban (169 ka kaso); Tisa (159); Lahug (116) ug Camouthaw (113).

GIDOBLE NA