ANG Department of Labor and Employment (Dole) sa Miyerkules, Septiyembre 9, 2020, nibutyag nga dul-an sa 10,000 ka mga establisemento sa nasod ang napakyas sa pagtuman sa mga sumbanan sa panglawas ug kaluwasan sa nasod aron kapanalipdan ang mga trabahante gikan sa coronavirus disease 2019 (Covid-19).

Atol sa hearing sa House of Representatives committee on appropriations, si Dole Assistant Secretary Maria Teresita Cucueco niingon nga 9,943 ka mga establisemento wa makatuman sa health protocol sa departamento sa Agusto.

“In August, there are 40,943 establishments that were inspected. We have already seen 31,000 establishments that have been complying, with a compliance rate of 75 percent,” matod ni Cucueco.

Wa siya motumbok kon asa sa guidelines ang wa masunod.

Ubos sa interim guidelines sa workplace prevention and control of Covid-19, nga gipagawas sa Department of Trade and Industry (DTI) ug Dole sa Mayo 1,2020, tanang mga kawani gimandoan sa pagsul-ob og face masks sa tanang mga higayon. (JM, SunStar Philippines)