Ang Cebu City Agriculture Department nikonsiderar sa 11 ka mga barangay sa dakbayan sa Sugbo nga hot spots gumikan sa report nga adunay mga baboy nga nangamatay.

Kini ang gibutyag ni City Agriculturist Joey Baclayon kinsa hugot nga magmonitor sa pagpamuhi og baboy labi na sa kabukiran sa dakbayan.

Ang mga hotspot nga barangay mao ang Inayawan, Bulacao,Cogon Pardo, Toong, Buhisan,Tisa, Sudlon II, Cambinocot, Busay, Budlaan ug San Jose.

Si Baclayon nagkanayon nga gikonsider kini nga hot spots kay adunay report sa pagkamatay sa mga binuhing baboy apan base sa gihimo nilang mga test, negatibo kini sa African swine fever (ASF).

Apan si Dr. Jessica Maribojoc sa Department of Veterinary Medicine and Fisheries (DVMF) nagkanayon nga adunay walo ka samples nga nagpositibo sa ASF gikan sa backyard nga nahimutang sa urban barangay.

Si Maribojoc nagkanayon nga hugot nilang gi-monitor ang mga binuhing baboy sulod sa 500-meter radius ug mga kasikbit niini.

Wala usab nipatuman og “culling” ang City Government sulod sa 500-meter radius, inay sila nag-obserbar sa mga baboy.

Kon dili masakit o mamatay ang baboy lapas sa duha ka semana, nagpasabot kini nga mahimo nang mabaligya kun ready na i-harvest.