Dul-an sa 11,000 ka tinun-an sa dakbayan sa Sugbo makadawat og P4,000 nga balor sa financial assistance gikan sa Department of Social Welfare and Development (DSWD).

Si Dr. Ester Concha, pangulo sa Department of Social Welfare and Services (DSWS) sa siyudad, nisaysay sa SunStar Cebu kagahapon, Septiyembre 18, 2022, nga ang ilang buhatan mipagawas na og cash aid alang sa kapin sa 4,000 nga tinun-an sa unang hugna sa distribusyon.

Matod ni Concha, ang dakbayan sa Sugbo adunay 11,191 ka mga tinun-an ang nakarehistro sa online portal sa DSWD’s Assistance to Individuals in Crisis Situations (AICS).

Ubos sa programa, ang indigent o kabus nga tinun-an sa elementarya makadawat og P1,000; high school, P2,000; senior high school, P3,000; ug college o vocational students, P4,000.

Itande sa mga dakbayan sa Mandaue ug Lapu-Lapu, si Concha nagkanayon nga ang dakbayan sa Sugbo maoy labing daghan nga student-beneficiaries alang sa DSWD’s cash assistance program.

GI-SCHEDULE

Tungod sa kadaghan sa mga tinun-an, ang pagpang-apud-apod gibahin og upat ka hugna, diin ang una niadtong Septiyembre 17, 2022 ug karong Septiyembre 20, 22, ug 24.

Ang distribution area ipahigayon sa Cebu City Sports Center, matod ni Concha.

Sa pasiuna, 4,417 ka mga tinun-an nga nakadawat sa cash assistance ang gikan sa Barangays Basak Pardo, Buhisan, Calamba, Guadalupe, Kalunasan, Labangon, Poblacion Pardo, Punta Princesa, Quiot, San Nicolas Proper, ug Tisa.

Si Concha nagkanayon nga ang mga tinun-an nga nakaproseso sa ilang online registration alang sa AICS pahibaw-on pinaagi sa email o text kon kini kuwalipikado nga benepisaryo.

Ang evaluation sa applicants gidumala sa DSWD apan si Concha nagkanayon nga ang DSWS sa dakbayan mitunol og hinabang pinaagi sa paghatag ngadto sa social workers kinsa miabag kanila sa gihimong assessment process.

Ang kuwalipikado nga tinun-an kinahanglan mopresentar sa ilang school ID ug labing ulahi nga study loads alang sa college students sa ilang pagkuha sa financial assistance.