LABING minos pito ka mga barangay sa Dakbayan sa Sugbo ug lima sa Dakbayan sa Mandaue apektado sa baha ug landslide dihang nagsugod pagbunok ang uwan sa Metro Cebu alas 8 sa buntag sa Martes, Septiyembre 15, 2020 hangtod sa Miyerkules sa buntag, Septiyembre 16.

Mga disaster personnel nanubag sa mga alarma sa baha ug landslide nga sagad nahitabo sa lawom nang gabii sa Martes.

Sa Cebu City, niabot og 16 ka mga pamilya kun 95 ka individual ang apektado sa pagdahili sa yuta, apan maayo nalang kay way gika report nga naangol o nakalas.

Sa sityo Cadahuan, Barangay Talamban, tulo ka mga balay apektado sa landslide, usa niini grabeng pagkaguba, matod pa ni Konsehal Jerry Guardo, kinsa maoy gitahasan ni Mayor Edgardo Labella sa pagsusi.

Sa sityo Iberita sa Lower Kalunasan, 13 ka mga individual ang apektado usab sa landslide.

Sa sityo Lahera sa samang barangay, adunay 70 ka mga individual ang apektado, apan nakabalik na sila sa ilang gipuy-an.

Adunay usa ka motorsiklo nga natabunan sa Downviews Subdivision, Barangay Busay ug laing tulo ka mga balay ang apektado usab sa landslide sa sityo Langub, Barangay Guadalupe.

Naa say landslide sa sityo Bakilid, Barangay Camputhaw, duol sa elementary school ug sa Laguerta sa Barangay Lahug.

Si Ramil Ayuman, pangulo sa Cebu City Disaster Risk Reduction and Management Office, nagkanayon nga apektado ang hapit tanang urban barangays sa baha labi na sa south district, sama sa Mambaling ug Pardo.

Ang grabe kalawom nga baha niigo sa sityo Tambisan, Barangay Tisa diin niabot og walo ka tiil ang giladmon sa baha.

Ang dapit gibisita nila ni Konsehal Phillip Zafra. Niadtong 2015, anaa lang sa 5 ka tiil ug unom ka tiil niadtong 2016 ang giladmon sa tubig subay sa markings nga ilang gibutang.

Si Ayuman makigtambayayong sa barangay aron ilang susihon ang drainange project aron masulbad ang pagbaha.

Si Ayuman nakig-alayon na sa Department of Social Welfare and Services (DSWS) para sa paghatag og ayuda labi na sa pagkaon ngadto sa mga apektado.

Tungod sa way hunong nga uwan, ang officer-in-charge sa Cebu City Police Office nipaandam sa 11 ka mga police station aron monitoron ang mga dapit nga peligro sa baha ug pagdahili sa yuta.

Si Police Colonel Josefino Ligan mipaandam dayon sa iyang mga kagamitan sa search and rescue unit sama sa pisi, pala, life vest, rubber boats, maso, suga ug uban pa aron maoy gamiton kon adunay mga residente nga luwason tungod sa walay hunong nga uwan.

Adunay 32 ka mga personnel gikan sa Cebu City Mobile Force Company ug 11 ka police stations nga maoy mag silbing search and rescue team kon ugaling mo grabe pa ang dautan nga panahon.

BAHA

Gibakwit ang tulo ka mga pamilya sa Sitio Panaghiusa, Barangay Tingub, Mandaue City ngadto sa Tingub Elementary School gym human sa grabeng pagbunok sa uwan ug pagbaha sa ilang lugar alas 2 sa kaadlawon sa Miyerkules,

Septiyembre 16, 2020.

Matod ni Felix Suico, Mandaue City Disaster Risk Reduction Management Office operations head, nga gisiguro nalang nila og bakwit ang tulo ka mga pamilya tungod hapit na molapaw sa tawo ang giladmon sa tubig.

Niadto, sigon ni Suico, nga ang sitio aduna kini sapa, apan sa sige og develop sa lugar, naalihan na ang agianan sa tubig hinungdan nga di na makalusot.

Tungod sa pagbunok sa uwan niadtong Martes, nisaka ang tubig ug gisiguro nalang og pabakwit sa CDRRMO ang tulo ka mga pamilya.

Dugang ni Suico nga pagbuntag sa Miyerkules, nibalik ra sab dayon ang tulo ka pamilya sa ilang balay human nikutat ang baha.

Ang Sitio Riverside A sa Barangay Subangdaku, Mandaue City nakasinati sab og pagbaha susama sa nasinati sa Barangay Tingub.

Apan matod ni Suico nga wala mitugot ang mga lumulupyo sa pag-evacuate ug igo lang nila nga gipasaka ang ilang gamit aron di maabtan sa baha.

Nakasinati sab og baha ang ubang barangay sama sa Tipolo, Banilad, Cabancalan, ug Paknaan.

Dugang sab ni Suico nga ang Butuanon River ni-overflow lang gihapon apan di susama sa niagi nga kinahanglan nga i-evacuate ang mga lumulopyo sa Barangay Paknaan.

Sa nakita nilang Suico nga mas preparado na sab ang mga lumulopyo sa lugar ug ang ila nalang sa CDRRMO ang pag-monitor sa ilang sitwasyon. (dugang taho ni AYB)