NAGPATABANG ni Konsehal Dave Tumulak ang ginikanan sa 13 anyos nga dalagita kinsa giingong gilugos sa kanhi broadcaster nga abogado niadtong Hulyo tuig 2017.

Bitbit ang kopya sa warrant of arrest, ang amahan ug inahan sa 13 anyos niadto sa buhatan ni Tumulak para masugdan og husay ang kaso.

Ang ginikanan sa 13 anyos niingon nga niadto pa sila sa Quimonda building sa North Reclamation area aron susihon kon tinuod ba nga aduna nay arrest warrant si JurielPatiño kinsa usa ka abogado.

Ilang nasuta nga positibo ug niadto pang Hulyo 2018 giisyo ni Judge Marlon Jay Moneva sa Regional Trial Court Branch 20.

Ang Superbalita Cebu nisuway og tawag kang Patiño alang sa iyang pamahayag apan wala kini makontak.

Si Tumulak, chairman sa committee on public order and safety sa Konseho, niawhag ngadto sa kapulisan sa pag-serve sa warrant batok sa suspek. (PAC)