DI MOMINOS 131 ka toneladang basura ang nakolekta sa Department of Public Services (DPS) mugna sa minilyon ka mga tawo nga mitambong sa ika-40 nga Sinulog Grand Parade sa dakbayan sa Sugbo.

Si Atty. Jigo Dacua, pangulo sa DPS nagkanayon nga labing daghan nga basura nga ilang nakuha nahimutang sa Osmeña Boulevard paingon ngadto sa Fuente Osmeña ug Mango Avenue.

Alas 4:30 sa kaadlawon kagahapon, Marete, Enero 21, hingpit nang nasilhig ug nahakot sa mga personnel ug garbage truck sa DPS ang tanang basura human sa Sinulog.

Iyang gipadayag nga alas 8 pa sa gabii niadtong Enero 19, ang mga metro aide nikuha ug nipundok na sa mga basura hinungdan nga dili na daghan ang nagtapok nianang pagka-kadlawon.

Ang kapin o kulang 600 ka mga personnel DPS diin ang ubang opisina nitabang usab sa pagpanglimpyo naglisod og kuha sa mga basura nga napasok sa drainage diin kinahanglan nilang i-manomano.

Nakahatag usab og kalisdanan sa mga street sweeper ug garbage loaders mao ang bul-og sa mga sakyanan nga mosulod hilabi na sa downtown ug uptown areas.

Si Mayor Edgardo Labella nipahibawo nga iyang hatagan og tag 10 kilos nga bugas ang mga personnel nga naglangkob sa clean-up operation.

Si Dacua, City Administrator Floro Casas Jr., Assistant City Administrator Junine Aragones kinsa mao sab ang hepe sa Cebu City Environment and Sanitary Enforcement Team (Cceset) ug Irvin Cabales, ang assistant head sa DPS, personal nga ni-supervise ug nag-monitor sa pagpanglimpyo sa 6 ka kilomentro nga Sinulog route sa dakbayan.

Sa kinatibuk-an, gitug-an ni Dacua nga niabot og kapin 800 tonelada nga basura ang ilang nahakot apil na ang mga regular garbage gikan sa mga barangay.