MOABOT ngadto sa 43 ka mga barangay kapitan sa syudad sa Sugbo, diin ang ilang lugar giila nga seryoso ang problema sa illegal nga drugas, gitigom sa hepe sa Cebu City Police Office aron mapatuman ang gubat batok sa illegal nga drugas.

Sa 43, 17 niini maoy dunay labing grabe nga suliran.

Gusto sa CCPO nga masayran kon unsa nga mga lakang ang ilang mahimo ug unsay ilang matabang.

Sagad sa mga barangay naa sa habagatang Sugbo.

Gisusi ni Senior Superintendent Royina Garma ang kapin sa napulo ka mga barangay sa syudad sa Sugbo nga ginganlan sa Philippine Drug Enforcement Agency 7 nga seryoso ang problema sa illegal nga drugas.

Dinhi iyang nasuta kon unsa ka tinuod ang maong report.

Matod ni Garma nga usa sa ilang gihisgutan sa tigum mao ang pagkuha sa ilang suporta sa matag barangay opisyal sa ilang kampanya batok sa illegal nga drugas.

Ang mga barangay nga nitambong sa meeting uban ni Garma mao ang Sambag 1 ug Sambag 2, Quiot, Buhisan, Sawang Calero, Duljo Fatima, Basak San Nicolas, San Nicolas Proper, Kinasang-an, Pasil, Ermita, Basak Pardo, Mambaling, Day-as ug Suba nga giingong adunay seryoso kaayong problema sa illegal nga drugas.

Samtang niapas usab ang ubang mga barangay nga padayon ang paghitak sa illegal nga drugas ilabi na sa Talamban ug Pulangbato sa norte nga bahin sa syudad sa Sugbo.

“All barangay captains nga declared nga seriously affected ang barangay nila base sa PDEA report at yung katabi ng seriously affected na barangay kase vulnerable din ito na magiging serious din, ang agenda I will get their support, I want to hear their plan sa barangay nila,” matod ni Garma.

Giangkon ni Garma nga di nila makab-ot ang pag limpyo sa illegal nga drugas sa matag barangay kon way abag gikan sa mga opisyal niini. (AYB)