Moabot ngadto sa 17 ka mga tawo ang nadakpan sa kapulisan sa Central Visayas sukad gipatuman ang liquor ban niadtong Dominggo sa kaadlawon, Mayo 8, 2022 hangtod alas 6 sa buntag sa Mayo 9, 2022.

Matod ni Police Brigadier General Roque Eduardo Vega, hepe sa Police Regional Office 7 (PRO 7) nga ang Bohol Police Provincial Office (BPPO) maoy dunay labing daghan, diin nakasikop silag walo.

Gisundan kini sa Lapu-lapu City Police Office nga adunay upat, tulo sa siyudad sa Mandaue ug duha sa probinsya sa Sugbo. Samtang nakatala usab silag 13 ka tawo ang nadakpan nunot sa kalapasan sa Presidential Decree 247 kun pagguba sa Central Bank notes sama sa pag stapler sa kwarta nga adunay gipataban nga sample ballots nga gituohan nga gipamalit og boto.

Ang labing daghan nga nadakpan ang Cebu City Police Office (CCPO) nga adunay 12. Si Police Colonel Engelbert Soriano, hepe sa kapulisan sa lalawigan sa Sugbo, nihulagway nga malinawon ra sa kinatibuk-an ang tibuok probinsya nga walay natala nga problema sa mga polling center.