NADAKPAN sa kapulisan ang 170 ka mga sugarol sulod sa buwangan niadtong Martes sa hapon sa Sitio Luwan-Luwan, Brgy. Poblacion 1, Dakbayan sa Carcar.

Ang buwangan nga Triple A Galleria gipanag-iya sa usa ka negusyante, kinsang ngan gipugngan lang una.

Ang buwangan duna lay permiso sa pagpahigayon og mga sultada sa Dominggo, apan nagpatari kini matag Sabado, Lunes ug Martes.

Si Police Lt. Col. Clarrisa Gabutan, hepe sa Carcar Police Station nga nahinabi sa Superbalita Cebu, nibutyag nga joint operation nila uban sa mga sakop sa Regional Intelligence Division(RID-7) Provincial Intelligence Branch (PIB) ang pagronda human sa daghang reklamo nga nadawat kabahin sa illegal nga tari sa manok.

Atol sa operation, 37 ka mga inugtatari nga manok ug duha nga patay nakuha sa kapulisan.

Atol sa operasyon, dunay mga nasamad, nangapangos samtang ang uban nisaka ang blood pressure kay nakuyawan.

Matod pa ni Gabutan nga ang gihatag nga permit sa buwangan Dominggo ra, gawas kon dunay fiesta, holiday o special holiday.

Ang mga dinakpan gitapok tanan sa barangay gym alang sa pagpasaka sa kasong illegal gambling. (GPL)