ORMOC CITY, Leyte -- "Mananom og kahoy." Kini ang gipalanog ni Ormoc City Mayor Richard Gomez atol sa paghinumdom sa ika-28 ka tuig human sa flash flood niadtong 1991.

Matod sa mayor, iyang mandoan ang City Disaster Risk Reduction and Management Office ug City Agriculture Office aron panghingusgan ang programa.

"We hope and pray that nothing like this happens again, nga wala na'y flash floods, Typhoon Yolanda and earthquakes. But we will never know when they will come again, so dapat andam ta pirmi," matod ni Gomez.

Dugang sa mayor nga sa maong hitabo dapat magkat-on na ang katawhan, kon duna'y mga balaod dapat kini sundon aron dili na masubli ang grabeng kadaot.

"Usahay, naa'y mga balaod nga kinahanglan nato nga tanggalon, kining mga balay nga duol sa sapa. Dapat nga motuo ug mosunod ta," dugang ni Gomez.

Gilantaw sa mayor nga kon duna'y baha, labing maapektuhan mao ang naa nanimuyo daplin sa sapa gumikan kay duna'y posibilidad sa pag-apaw sa tubig.

"Because if something happens, if naa'y baha then kinsa ma'y mamatay kining naa duol sa sapa," pasabot sa mayor.

Niadtong Nobiyembre 5, 1991, nahitabo ang flash flood nga mikalas og liboan ka kinabuhi ug mibanlas sa halapad nga kabtangan sa Ormoc.

"Dapat mananom ta og mga kahoy ug bamboos sa atong riverbanks," matod sa mayor.

Sagad sa mga naapektuhan ang naa sa City proper hilabi na ang naa nanimuyo daplin sa sapa. (PR)