DOS anyos nga batang lalaki namatay sa sunog sa alas 9 sa Sabado sa buntag, Mayo 28, 2022 sa Purok 4, Barangay 77, Bañez Ville, Dakbayan sa Tacloban, Leyte.

Ang biktima giilang si Marlou Laguipo Jr., nagpuyo sa dapit samtang naangol ang 15 anyos nga babayeng giila nga si Rayanna Balongoy, tinun-an.

Ang nasunog mao ang usa ka balay nga gipanag-iya ni Nelia Magbagay, 59, minyo, dispatser.

Matod sa Bureau of Fire Protection (BFP) nga mga alas 9:07 sa buntag nangabot ang kabomberohan sa dakbayan sa dapit nga nasunogan.

Mga alas 9:17 nakontrolar ang kayo ug nianang alas 9:20 hingpit kining napawong.

Si Marlou Laguipo Sr., 31, niasoy nga samtang siya ug ang iyang kapuyo nangatulog, ang ikaduhang andana sa ilang balay nga gama sa light materials nasunog.

Dali silang nigawas uban sa iyang bayaw ug dihang ilang naamguhan nga wa ang iyang mga anak, dali silang nibalik aron pagluwas sa mga bata, apan si Marlou Jr. wa na niya makuha pa kay natug kini sa gigikanan sa kayo.

Mga alas 11 sa buntag nakaplagan ang lawas sa bata.

Gitino pa ang hinungdan sa sunog ug pila ang danyos. (REV)