CATBALOGAN CITY, Samar -- Duha ka estudyante ang nadakpan sa anti-illegal drug operation sa kapulisan sa Catbalogan.

Giila ang mga nadakpan nga sila Johnmel Pontanes, 21, taga Purok 4, Barangay Canlapwas ug si Jerome Martinez, 19, nagpuyo sa samang barangay.

Matud sa kapulisan nga naa sa drug watchlist ang duha ka dinakpan.

Nakadawat og daghang report ang kapulisan bahin sa kalambigitan sa duha ka tinun-an sa ilegal nga drugas.

Niini, gipaubos sa surveillance ang duha ka suspek.

Taud-taod nga gipanid-an sa kapulisan ang duha.

Alas 12:45 sa miaging adlaw, gilusad sa kapulisan ang buy-bust operation batok kang Pontanes.

Nasikop ang suspek ug narekober ang 13 ka pakete sa gituhoang shabu nga may estimated value nga P18,000.

Samtang pagka alas 3:45 sa hapon, nasikop sa lahi nga buy-bust operation si Martinez.

Narekober sa kapulisan ang tulo ka pakete sa gituhoang shabu nga may estimated value nga P3,000.

Matud ni Police Lieutenant Colonel Doughlas Antonio Eloja, seryoso sila sa pagsikop sa mga drug personalities sa ilang area of responsibility.

Di usab nila palampason ang pagsikop sa mga drug surrenderer nga nibalik sa ilegal nga binuhatan.

Naa na karon sa kustodiya sa kapulisan sa Catbalogan ang mga suspek samtang nag-atubang og kasong kalapasan sa Anti Dangerous Drugs Act of 2002.