DUHA ka mga tawo ang gipusil-patay ug laing usa ang angol sulod sa pito ka oras sa managlahing dapit sa dakbayan sa Sugbo.

Unang biktima mao si Young Ho Lee, Korean national, gipusil-patay sud sa usa ka hotel sa Holy Name St., Barangay Mabol, alas 6:20 sa gabii niadtong Dominggo.

Sumala ni Sr. Insp. Janelito Marquez, acting Mabolo Police chief, nasuta sa ilang pagsusi sa dapit sa krimen nga dunay drug-sniffing paraphernalia ug resibo sa cash transaction giklan sa usa ka lalaki nga taga lungsod sa Consolacion.

Ang maong lalaki gituohan nga drug personality sa maong lungsod, matod ni Marquez.

“Sumala sa witness nga atong nahinabi nga nangayo daw ni (biktima) og sorry, niana daw nga 'sorry, sorry, sorry sorry', so maybe nakasala ning Koreano or nakatabla og kwarta ba,” matod ni Marquez.

Pagka alas 7:00 sa gabii sa samang adlaw, manedyer sa usa ka food delivery service gipusil samtang naglakaw sa sa dalan sa Sitio Tangkongan, Barangay Sambag 1.

Ikatulong kaso mao ang wala mailhing lalaki ang gipusil-patay sa bugtong mamumuno sa Veteran’s Drive, Barangay Apas kagahapon sakaadlawon.

Samtang, patay ang usa ka armadong lalaki human misukol sa polis nga misuway unta sa pagpakalma kaniya diha sa may Zone 4, Brgy. Candulawan, dakbayan sa Talisay niadtong Dominggo sa hapon.

Ang napatay giila sa kapulisan nga si Nonito Fantonial, 36, nagpuyo sa maong dapit.

Sa inisyal nga imbistigasyon sa kapulisan nasayran nga ang suspek (napatay) uban sa unom ka lalaki nangulata sa usa ka Dindo Saban Soterol, 26 anyos, taga Sitio Candahat, Brgy. Toong, dakbayan sa Sugbo.

Si PO1 Jake Recopelacion Bacalso, nagpuyo sa maong dapit, nitubag sa alarma ug nagpaila nga pulis,

Apan inay nga mopatuo, nangisog kini og samot dayung ug nisukol sa pulis hinungdan nga giunhan na kini sa pagpusil. SunStar Cebu, Jude Suhot