DUHA ka mga anggulo ang gitan-aw karon sa kapulisan human gipusil patay ang duha ka mga negosyante sa Cordova Public Market sa Barangay Poblacion, lungsod sa Cordova alas 7 sa gabii niadtong Biyernes.

Ang patay giila nga sila si Analyn Menguito, 37, ug si Gilbert Bayot, hamtung ang pangedaron.

Matod ni SPO1 Erwin Gedorio nga paingon na manira sa iyang tindahan sa mga dry goods si Menguito dihang kalit nga naabot ang mamumuno nga naghelmet ug kalit sila nga gipamusil.

Kanunay motabang si Bayot kang Menguito sa iyang tindahan, apan nanag-iya usab kini og barber shop sa maong merkado.

Base sa imbestigasyon sa Cordova Police, nitumaw ang duha ka mga anggulo sa pagpamusil patay niining duha.

Posible nga selos tungod kay nasayran nga minyo pulos ang duha.

Apan ang asawa ni Bayot giingon nga anaa sa laing nasod ug giingon nga aduna’y mutual understanding ang duha hinungdan nga motabang si Bayot kang Menguito sa iyang tindahan.

Ikaduhang anggulo nga gitan-aw mao ang kabahin sa negusyo tungod kay nasayran usab nga aduna’y nakalalis si Menguito kabahin sa iyang pwesto sa maong merkado.

Dugang ni Gedorio nga nahagba diha-diha sa iyang tindahan si Menguito samtang si Bayot, nakadagan pa ug nadala sa tambalanan, apan gideklarar nga patay.

Aduna’y nakuha nga upat ka mga kabhang sa kalibre .45 nga pistola sa crime scene ug upat ka mga slug sa maong armas.

Padayon ang imbestigasyon sa maong insidente.

Nasayran nga duol ra sa barangay hall sa Poblacion ang nahitaboan.