Gi-monitor sa Land Transportation Office sa Central Visayas (LTO) 7 ang duha ka pribadong driving schools sa rehiyon nga gikatahong nagtanyag og theoretical and practical driving course (TDPC) certificates nga dili na kinahanglang moatubang pa ang ilang mga kliyente.

Gumikan niini, si LTO 7 Director Victor Emmanuel Caindec niingon nga nagpahigayon sila karon og imbestigasyon sa mga pasangil batok sa duha ka pribadong driving schools.

“We are conducting an investigation after we receive reports that these driving schools reportedly issued certificates in exchange without need to undergo the course and just let their clients pay a certain amount, which is illegal,” matod ni Caindec.

Si Caindec wala mobutyag kon diin nagbase sa rehiyon ang duha ka pribadong driving schools.

Subli usab nga gitataw ni Caindec ngadto sa mga moduaw sa ilang buhatan nga mga reklamante nga importanteng tarungon ang mga pasangil pinaagi sa pag-execute og affidavit aron mapormal ang reklamo.

“We need to make sure that these people would execute a affidavit to ensure fairness. But we assure them that we are verifying their allegations. In fact, we endorsed several complaints against these driving schools who offer their illegal services on Facebook before the NBI (National Bureau of Investigation) halos kada semana,” dugang ni Caindec.

Gawas sa duha ka mga tunghaan, si Caindec niingon nga ila usab nga gimonitor ang tanang private driving schools sa rehiyon.

Sa pagkakaron, adunay kapin sa 80 ka mga pribadong eskwelahan sa pagmaneho nga akreditado sa rehiyon.

Ang LTO Memorandum 2019-2176 o ang “Rules and regulations on accreditation, supervision, and control of driving institutions, and on standardization of driver education” nagmando sa tanang mga aplikante alang sa student-driver’s permit nga mopailawom sa 15 ka oras nga TDPC.

Dugang ni Caindec nga gawas sa mga nagtanyag og certifications nga may bayad, ila usab nga gi-monitor ang mga driving school nga dili ubos sa ilang geographical area of responsibility apan nagbutang sa ilang serbisyo sa Central Visayas ilabi na sa Sugbo.

Gawas sa pagkanselar sa ilang accreditation, si Caindec niingon usab nga pasakaan nila og kaso ang maong mga pribadong tunghaan tungod sa paglapas sa Republic Act 10175 o ang Cybercrime Prevention Act of 2012 kon mapamatud-an nga sad-an sa mga ilegal nga buhat. (JKV, PR)