Ang Cebu City Police Office (CCPO) ug ang Kagamhanan sa Dakbayan sa Sugbo mokiha og alarm and scandal sa duha ka mga grupo nga nagrambol sa Gen. Maxilom Ave. sa Barangay Camputhaw niadtong Sabado sa kaadlawon, Disyembre 3, 2022.

Sa video nga gi-upload sa usa ka netizen sa iyang Facebook account, makita ang panagrambol sa mga batan-on pasado alas 4:00 sa kaadlawon sa naasoy nga adlaw.

Nakita nga usa ka lalaki ang gitabangan sa pagkulata apan kalit lang niabot ang usa ka pulis nga maoy niuwang sa duha ka mga grupo ug nakita sa video nga wala kini mopatuo bisan sa pagbadlong sa mga nakasaksi.

Human kini nag-viral sa social media, dali nga nimando si Police Colonel Ireneo Dalogdog, hepe sa Abellana Police Station, nga ilhon kinsa ang nalambigit nga grupo aron ipatawag sa iyang buhatan.

Daling nailhan ang duha ka grupo ug gipatawag ni Dalogdog sa iyang opisina uban ni Konsehal Philip Zafra, chairman sa peace and order committee sa Konseho sa dakbayan, lakip ni Kamputhaw Brgy. Captain Jessica Cadungog.

Nasuta nga babaye ang hinungdan sa away.

Giingong niduol ang lalaki nga hubog sa babaye aron makig-inom apan sa dihang gibalibaran, kay matUd pa, duna siyay mga kauban, giatangan sila sa gawas ug didto nagkarambola.

Atol sa tigum, pulos kini nangayo og pasaylo sa ilang nabuhat ug nahukman sa duha ka mga grupo nga dili na mopasaka og kaso ug nagkauli ra ang ilang maayong kabubut-on.

Bisan pa man nga nagkauli ra ang duha ka mga habig, ang Kagamhanan sa Dakbayan ug kapulisan mosang-at og reklamo ngadto sa piskaliya sa kasong alarm and scandal.

Kini aron motagam ang mga batan-on nga mohimo og kasamok sa kadalanan sanglit dili lang makausa ka higayon nga dunay insidente sa kagubot nga hinimoan sa mga batan-on nga mag-inom.

Giklaro hinuon ni Dalogdog nga ang duha ka mga grupo nga nalambigit sa kagubot dili na mga menor de edad sanglit nagpangidaron na kini og 27 anyos pataas. (AYB)