DUHA ka Korean nationals ang nasikop tungod sa pag-operate og illegal online gambling sulod sa ilang condominium unit sa Barangay Mabolo, siyudad sa Sugbo niadtong Huwebes, Marso 22, sa buntag.

Ang mga dinakpan giila nga silang Yihyuk Jang, 35, ug Jongwon Do, 28, lumad nga taga South Korea apan kasamtangang nagpuyo sa Villa Aurora Subdivision sa Mabolo.

Si Atty. Tomas Enrile, hepe sa National Investigation (NBI) 7, niingon nga nakuha sa ilang pagronda sa condo unit sa mga Koryano mao ang mga gamit sa illegal online gambling sama sa computer, cellular phones ug uban pang gadgets alang sa pag-operate sa illegal online nga sugal.

Ang modus sa mga dinakpan mao ang pagpahigayon og online gaming sama sa basketball, soccer ug uban pang klaseng duwa sa online.

Tungod niini, ang NBI nakig alayon dayon sa Philippine Amusement and Gaming Corporation (Pagcor) nga maoy ahensya nga gitahasan pag regulate sa bisan unsa nga matang sa sugal.

“Wala moluwat og pamahayag ang duha ka Koreano nga naa sa kustodiya sa NBI-7. (AYB)