NANGAMATAY diha-diha ang duha ka mga lalakeng menor de edad human pamusila sa duha ka wa mailhing mga mamumuno sa Brgy. Babag, Dakbayan sa Lapu-Lapu, pasado alas 9 sa Lunes sa gabii, Septiyembre 30, 2019.

Ang duha luwan sa usa ka traysikol, usa nila maoy nag-drive.

Kapulisan wa pa makaestablisar og motibo sa pagpusil patay kanila ni Manap Mapintao, 17, taga Sudtunggan, Brgy. Basak ug iyang silingan nga si Paul Villareal, 16.

Matod ni Senior Master Sergeant Joefrey Managase, imbestigador sa Police Station 3 sa Lapu-Lapu City Police Office (LCPO), sila si Mapintao ug Villareal gikan sa Brgy. Poblacion proper luwan sa traysikol.

Ang duha paingon sa lungsod sa Cordova dihang gipusil sa usa ka gunman nga luwan usab og motorsiklo atubangan sa usa ka convenience store sa Brgy. Babag. Nasuta sa imbestigasyon nga gisundan ang duha ka teenagers.Pag-abot sa eskina Tiangue sa Brgy. Babag kalit nga gipusil si Mapintao, kinsa maoy nagmaneho sa traysikol niadtong tungora. Si Mapintao nahagba ug namatay.

Daling nikanaog sa traysikol si Villareal ug nidagan apan gigukod sa gunman ug gipusil hinungdaan sa iyang pagkahagba pipila ka metros gikan sa nahagbaan ni Mapintao.

Dali ra usab nga misibat ang gunman human sa pagpamusil luwan sa getaway motorycle.

“Kuyog ni sila wala ni pasahero. Sila ramang duha unya sila man gyud ang target kay gisundan man gyud sila unya gigukod gyud ang 16-anyos bisag misuway og dagan,” matod ni Managase.

Ila pang gisusi ang background sa duha ka mga biktima sanglit wa silay nahibaw-an sa ilang pagkatawo.

Samtang wa pay kabanay ni Villareal nga nibisita sa police station para makig-alayon sa kapulisan. Nagkig alayon na usab ang Police Station 3 sa Police Station 4 diin masakop ang gipuy-an sa duha ka biktima alang sa posibleng record niini.

Susihon pa usab sa kapulisan kon nakuha ba sa closed circuit television (CCTV) ang pagpamusil. Samad pinusilan sa nagkadiyang bahin sa lawas ang naangkon sa duha ka mga biktima gikan sa wa pa matinong kalibre sa armas de fuego.