Duha ka mga patay ang nakaplagan sa managlahing dapit sa dakbayan sa Sugbo niadtong Sabado, Agusto 13, 2022.

Sa alas 3:00 sa hapon, ang kapulisan sa Barangay Mabolo niresponde sa alarma sa nadiskobrehan nga patay sud sa lawas sa usa ka balay sa dalan Torralba, Barangay Apas.

Sa imbestigasyon ni Patrolman Alvic Salimbot sa Mabolo Police Station sa Cebu City Police Office (CCPO), nailhan nga usa ka Joey Francisco Dela Cerna, 45, ang maong namatay nga nag-abang og kwarto sa maong lugar.

Ang patay nadiskobrehan dihang ang kaubang boarders nakabantay nga dunay baho nga ilang namatikdan hinungdan nga nangayo sila og pakitabang sa kapulisan.

Didto nasuta nga anaa na sa state of decomposistion ang lawas sa biktima, gituohang natural ang pagkamatay niini ug walay nakita nga foul play sa kamatayon niini.

Samtang kapin sa oras ang nilabay, ang kapulisan sa Carbon Police Station sa CCPO nakadawat og taho nga dunay patay nga nakit-an sa Unit-2 Carbon, Barangay Ermita.

Si Police Corporal Jan Reynald Oporto nibutyag nga usa ka 62 anyos nga nailhan nga si Mary Lou Jatutillo Buanhug, lumad ang maong namatay nga taga Angeles, Pampanga ug nagpuyo dinha sa Sityo Pig-Vendor sa Barangay Ermita.

Nasayran nga katapusan nga nakit-an ang senior citizen niadtong Biyernes, Agusto 12, diin gipalitan kini og pagkaon sa nagpakabana nga silingan apan wala niini kan-a, hinuon, gihatag ang maong pagkaon sa laing tawo human wala kini gana nga mokaon.

Ang maong lola nahibaw-an nga migahi na kini ug patay na dihang naabtan sa medical team. Sa ilang pagsusi, walay nakita nga foul play sa kamatayon niini.