WARNING ngadto sa mga adunay tinguhang mohimo og dautan sa syudad sa Talisay, kay sayon na ang paggukod kaninyo.

Mas mapadali pa unya ang pagresponde sa mga pulis sa syudad sa Talisay human nga mas nakatag na sila, tungod sa pagbukas sa ilang dugang duha ka mga police community precinct.

Gitukod kini isip usa ka police substation sa barangay Bulacao ug sa Lawaan 1.

Pormal kini nga gilusad kagahapon, Septiyembre 17 nga gitambungan ni Police Regional Office (PRO-7) director, Brigadier General Debold Sinas lakip na ang kadagkuan sa Cebu Provincial Police Office ug Talisay City Mayor Gerald Anthony Gullas.

Sa Bulacao Substation, nag-una nila nga responsibilidad ang kasagarang bukirang barangay sa Talisay City, nga naglangkob sa mga barangay Bulacao, San Isidro, Tabunok, Lagtang, Candulawan, Jaclupan, Campo4, ug Manipis.

“Ang Bulacao kasi more on mountainous area siya at saka nasa kanya ang business hub centers ng Talisay City, kay may special team deployed sa Bulacao. Yung Quick Reaction Team namin ay dito naka-house sa Bulacao. They can react immediately anywhere kasi more on motorcycle man sila mas madali na sa kanila,” saysay ni Talisay City Police Chief Police Major Orlando Carag Jr.

Samtang sa Sector 4, nga mao ang Lawaan 1 kansang jurisdiction ang mga barangay Lawaan 1, Lawaan 2, Lawaan 3, Tapul, Maghaway ug barangay Linao.

Samtang ang matag substation ang adunay supervisor.

Una na nga gibutangan og police substation sa barangay Tangke nga nagtutok dili lang sa maong barangay, apan lakip na sa Cansojong ug barangay San Roque.

Ang ubang mga barangay ang ubos na sa Poblacion diin nahimutang ang main office sa Talisay Police Station.

Dili mominus sa 20 ka mga pulis ang gibutang sa matag substation. (FMD)