SAMDAN ang usa ka gikatahapang drug pusher ug duha ka mga pulis sa Dakbayan sa Mandaue human sa pinusilay sa napakgang nga buy-bust operation sa may dan A.S. Fortuna, Barangay Banilad, Dakbayan sa Mandaue, Miyerkules sa buntag, Septiyembre 4, 2019.

Nipahigayon og buy-bust ang mga sakop sa Drug Enforcement Unit (DEU) sa Canduman Police Station kilid sa usa ka funeral home.

Sakay ang gikatahapang drug pusher nga si Jason Espensa Villa, 38, taga Brgy. Capitol Site, Dakbayan sa Sugbo sa iyang sports utility vehicle, Toyota.

Follow up operation kini human masikop sa kapulisan sa Canduman Police Station ang giingong kauban niini nga si Rene Jay Dalman Patigayon, 37, taga Canduman.

Dihang nakabantay si Villa nga pulis ang iyang kasabot, dali niya kining gipamusil, matod pa.

Nahitabo ang pinusilay nga daw sama sa usa ka salida sa sine. Duha sa mga pulis napangus sa ulo, tuhod ug siko human nabagnos sa ginukdanay. Wa sila maigo sa pagpusil.

Matod sa witness nga naninda og sud-an, nakadungog sila og tulo ka sunodsunod nga mga buto sa pusil. Nakita nalang nila nga nagginukdanay sila si Villa ug mga pulis. (ANV)