DUHA sa tulo ka mga tulisan nadakpan human sa ginukoray ug pinusilay tali sa mga pulis sa Biyernes, pasado alas 7 sa gabii sa Pebrero 19, 2021 sa dan N. Bacalso, Barangay Mambaling, Siyudad sa Sugbo.

Ang nakaeskapo nilang kauban maoy nakadala sa cell phone nga gipanag-iya sa 17 anyos nga menor de edad, kinsang ngan gipapugngan.

Matod ni Police Major Dindo Juanito Alaras, hepe sa Mambaling Police Station, nga nahinabi sa Superbalita Cebu, nga usa ka 17 anyos nga lalake ang gibiktima nila ni John Mark Cabaluna, 24, ug Remuel de Aquino 21.

Si Cabaluna gidala sa Cebu City Medical Center (CCMC) human nasamdan sa pakigpinusilay tali sa kapulisan.

Matod ni Alaras nga nakit-an sa ilang patrol car nga dunay naggukdanay nga niabot sa sityo Alaska. Girespondihan dayon kini sa mga pulis.

Si Cabaluna giingong namusil sa mga pulis, nga nakaingon nga napagan ang usa ka babaye sa saag nga bala. Si Cabaluna samdan sa tuo nga paa.

Ang babaye, 40, kinsa samdan sa tuo usab nga paa nihangyo sa Superbalita Cebu nga di nganlan. Nagpaalim siya sa iyang samad sa CCMC. (BBT)