DI momenus sa 20 ka mga estraktura ang naguba ug lima ka mga motorsiklo, tulo niini dunay mga tangkaltangkal, nasakmit sa clearing operation sa Siyudad sa Talisay.

Gihimo kini sulod sa tulo ka oras, gikan sa alas 8 hangtod sa alas 11 Sabado sa buntag, Agusto 17. Ang gilimpyuhn ang mga sidewalk nga nakapalibot sa flyover sa Barangay Tabunok, Dakbayan sa Talisay.

Gitug-an ni Jonathan Tumulak, pangulo sa City of Talisay Traffic Operations Development Authority (CT-TODA), nangulo sa pagpanglimpyo sa sidewalk ang Clearing Division sa Talisay City Hall ug gitabangan sa CT-TODA, Talisay City Police Station ug mga barangay opisyal sa Tabunok.

Apan moabot sa 20 pa ka nga estraktura nga nag-ali na sa sidewalk nga sementado ang gihatagan og kahigayunan nga sila na ang moguba.

Aron mamahimo nga legal, matod ni Tumulak nga ihatag nila ngadto sa City legal office ang mga ngalan sa estraktura ug mga tag-iya niini.

Alang na kini sa sulat nga ipadala sa City legal ngadto sa mga tag-iya, pagpasabot sa ilang kalapasan ug nga kinahanglan nga ma-demolish.

Pasabot ni Tumulak nga ang maong mga estraktura, kansang tag-iya padad-an pa og suwat sa City legal, mao kadtong mga sementado.

Mga commercial establishment ug ubang balay nag-extend sa sidewalk.

Sa sunod semana mohimo na sila sa clearing team og pag-demolish sa kongkreto nga mga estraktura kon dili mobulantaryo sa pagguba.

Ang gipanghipos sa clearing team mao kadtong mga lamesa o mga ginama lang sa light materials. Adunay mga tricycle, motorsiklo ug mga 4-wheeled vehicle ang ilang gipangsita nga nag-patakag park sa sidewalk.

Ang mga nasakmit nga motorsiklo mao kadtong mga driver nga nagmagahi sa pagsibog o pagbalhin sa ilang mga motorsiklo sa insakto nga ka-parkingan.

“Amo silang gipasabot nga nisunod lang ta sa programa sa gobyerno ug sa kamanduan sa pangulo sa nasud (Rodrigo Duterte) nga ibalik ang da’n ug sidewalk sa public, nga magamit sa hustong gamitan. Willing raman sad sila, ni-cooperate ra man. Walay resistance,” tug-an ni Tumulak sa Superbalita Cebu.

Nihimo na og information drive ang clearing division ug gisegundahan pa sa mga barangay opisyal ang mga anaa nag-ali sa sidewalk, sayo ning semanaha, nga limpyuhan na kini.