Ang Cebu City Government, inabagan sa Department of Public Works and Highways (DPWH)-7, nakabutang na og bike lanes sa 24 ka mga karsada sa Dakbayan sa Sugbo.

Lakip sa mga karsada nga adunay 1.5 metros nga bike lanes mao ang V. Rama Avenue ug mga dalan Salvador, Katipunan, Tres de Abril, Carlock, B. Aranas, Lakandula, Tupas, Magallanes, Jakosalem, Osmeña Boulevard, Lapu-Lapu ug Urdaneta.

Naa usab sa MJ Cuenco Avenue, Imus St.., MJ Cuenco Avenue, F Gochan St., F. Cabahug Street, Cardinal Rosales Avenue, Ayala Road, Gorordo Avenue, General Maxilom Avenue, Fuente Osmeña Circle ug B. Rodriguez St.

Ang paghimo og bike lanes pinasubay sa Cebu City Ordinance No. 2408 nga gipasar niadtong 2014 sa administrasyon ni kanhi mayor ug karon Bise Mayor Mike Rama.

Si Mayor Edgardo Labella niumol sa Sugbo Bike Lane Board (SBLB) sa miaging tuig para maoy motutok sa implementasyon niini taliwa sa pagdaghan sa mga nagbiseklita panahon ning pandemic.

Ang Cebu City Transportation Office niawhag sa mga motorista ug nagmaneho og mga sakyanan nga dili parkingan ang bike lanes, kon ilang makit-an, sigurado nga maisyuhan kini og traffic citation o i-tow.

Ang bike lane usa ka loop diin ang mga biker makagamit nga walay putol ug magamit sab sa mga motorsiklo o sakyanan apan ilang sigurohon nga walay biseklita nga nagsubay.

Kini nga matang sa bike lane gitawag og sharrow.

Si Labella nihatag og direktiba sa SBLB nga gipangulohan ni Atty. Gerry Carillo sa paghimo og bike lanes aron aduna nay maagian ang mga nagbiseklita aron masiguro ang ilang kaluwasan. (PAC)