Lalaki nga nasikop niadtong 2018 tungod sa giingong pagpamaligya og shabu online gipusil-patay sa Dominggo sa kaadlawon, Abril 9, 2023 sa sityo Kalubihan, Brgy. Sambag 2, dakbayan sa Sugbo.

Ang biktima giilang si John Angelo Bantilo, 26, nagpuyo sa dapit.

Matod ni Police Master Sergeant Alexander Terado, imbestigador sa Abellana Police Station sa Cebu City Police Office (CCPO), nga subay sa ilang imbestigasyon si Bantilo naglakaw dihang usa ka lalaki niduol kaniya ug nidiretso og pusil sa makadaghan.

Nahagba si Bantilo ug namatay diha-diha tungod sa mga samad pinusilan sa lawas.

Nakuha sa Scene of the Crime Operation (Soco) ang lima ka mga kabhang sa mga bala sa wa pa matino nga kalibre sa pusil. Matod ni Terado nga usa sa mga anggulo nga ilang gisubay mao ang illegal drugs.

Niadtong Nobiyembre 27, 2018, nasikop si Bantilo sa Abellana Police Station sa usa ka buy-bust.