MOABOT sa 267 ka mga locally stranded individuals (LSI) nakabalik na sa ilang lugar sa Probinsiya sa Bohol sakay sa mga barko sa Philippine Coast Guard (PCG) nga nag-ulhos pagdunggo sa pantalan sa Dakbayan sa Tagbilaran, Bohol.

Matod ni Commander Alvin Dagale sa PCG Cebu Station ug tigpamaba sa Philippine Coast Guard Central Visayas, nga ang bag-ong abot nga mga LSI apil sa mga nagpundo sa Rizal Stadium nga nangatanggong sa kaulohan.

Dugang ni Dagalea ang 267 puro mga Bol-anon nga nakabenepisyo sa “Hatid Tulong Program” sa kagamhanang nasyonal nunot sa coronavirus disease (Covid-19).

Sa wa pa sila makagikan, gipailawom sila sa rapid test ug gikompleto ang ilang mga dokumento alang sa pagbiyahe.

Tulo ka batch sa mga LSI ang nangabot sa dakbayan sa Tagbilaran sa Hulyo 28.

Unang miabot sa Tagbilaran ang 24 ka mga LSI, kinsa maoy unang batch sakay sa BRP Malapascua.

Dugang ni Dagalea nga nianang hapon, dugang 243 ka mga LSI ang nangabot.

Ang ikaduha nga batch miabot alas 3 sa hapon sakay sa BRP Gabriela Silang.

Mga 30 minutos ang milabay, miabot ang laing barko nga BRP Cabra nga gisakyan sa katapusang batch.

Ang ikaduha ug ikatulo nga batch nga miabot sa dakbayan sa Tagbilaran mao ang mga LSI nga naglangkob sa 243 ka mga indibidwal.

Ang mga bag-ong abot giatiman usab sa lokal nga kagamhanan sa Probinsiya ubos sa pagdumala sa Bohol Inter-Agency Task Force (BIATF). (BBT)